Trupi ynë nuk është në gjendje që ta prodhojë këtë substancë, ndaj e vetmja mënyrë për ta marrë është përmes ushqimit dhe veçanërisht te produktet me origjinë shtazore, si: mëlçia, mishi, vezët, qumështi, djathi, sardelet, trofta dhe disa lloje molusqesh.
Vitamina B12 është një ndër tetë vitaminat e grupit B, shumë e rëndësishme për trupin tonë, me rol kyç në funksionimin e mirë të trurit, sistemit nervor dhe në formimin e rruazave të kuqe të gjakut. Vitamina B12 dhe acidi folik marrin pjesë ne krijimin e qelizave dhe nxisin proceset e rritjes në trupin tonë. Trupi ynë ka nevojë për rreth 2-3 mcg (mikrogramë) në ditë, por kjo sasi kaq e vogël është me të vërtetë shumë e dobishme dhe mungesa e saj shkakton dëme të mëdha. Konkretisht, mungesa apo sasia e pamjaftueshme e vitaminës B12 në trupin tonë shkakton anemi, probleme me krijimin e qelizave të reja dhe probleme neurologjike. Dobësi, zbehje, rrahje të çuditshme të zemrës dhe probleme me frymëmarrje, lodhje e shpejtë janë këto ndër shenjat që manifeston trupi jonë si shkak i mungesës së kësaj vitamine. Mirëpo problemi lind nga fakti se trupi ynë nuk është në gjendje që ta prodhojë këtë substancë, e vetmja mënyrë për ta marrë është përmes ushqimit. Ndaj dhe sot në suplementin “Mapo Shëndeti” po listojmë disa ushqime me konsumimin e të cilave marrim edhe vitaminën B12.
Peshk
Për të mbajtur të shëndetshëm qelizat nervore dhe rruazat e kuqe të gjakut, vitamina B12 është e domosdoshme. Kjo vitaminë e tretshme në ujë, gjendet në sasi të bollshme te peshku. Një ushqim i jashtëzakonshëm për nga vlerat ushqyese sidomos për gratë shtatzëna. Me konsumimin e peshkut marrin sasinë e domosdoshme ditore të vitaminës B12.
Drithërat integralë
Zakonisht ushqimet me origjinë vegjetale nuk përmbajnë vitaminën B12, mirëpo disa drithëra integralë pasurohen apo fortifikohen me këtë lloj vitamine. Ndaj dhe me konsumimin e disa prej këtyre drithërave integralë turpi ynë furnizohet me rreth 30% të sasisë së domosdoshme ditore me vitaminë B12.
Midhjet
Përveçse janë një burim i çmuar i vitaminës C dhe hekurit, midhjet janë shumë të pasura edhe me vitaminë B12. Në fakt mjafton të konsumojmë vetëm 100 gramë midhje dhe përfitojmë rreth 340% të nevojës ditore të kësaj vitamine.
Djathi
Sasia e vitaminës B12 e pranishme veçanërisht te djathi kaçkavall është më e madhe se ajo e çdo lloj djathi tjetër. Konsumimi i 30 gramë të këtij djathi është e mjaftueshme për të furnizuar me rreth 14% të kërkesës ditore me këtë vitaminë.
Qumështi
Me konsumimin e një gote qumësht ne marrim rreth 20% të sasisë së domosdoshme ditore me vitaminë B12. Ndaj dhe nuk duhet neglizhuar apo të kufizojmë pirjen e një gote qumësht çdo ditë, pavarësisht prej proteinave apo kalorive që ia përmban, pasi mund të zgjedhim edhe qumështin e skremuar, i cili ka edhe më pak yndyra.
Veza
Veza përveçse konsiderohet një ushqim shumë i mirë, duhet ditur se është një burim i mirë proteinash dhe lëndëve të tjera ushqyese të domosdoshme për trupin tonë. Po kështu te veza gjenden sasi e mirë e vitaminës B12, e vlefshme kjo sidomos për personat vegjetarianë, në mënyrë që për të shmangin mangësitë e mundshme të kësaj vitamine, si shkak i moskonsumimit të mishit dhe nënprodukteve të tij.
Mishi i kuq
Mishi i kuq është një burim i shkëlqyer i vitaminës B12. Veçanërisht mishi i kuq përmban shumë prej kësaj vitamine, mirëpo rekomandohet që të përzgjidhet mishi i viçit, lopës apo qengjit, mundësisht ferme, rritur sa më bio dhe jo me produkte OMGJ.
Mish pule
Edhe mishi i pulës, sidomos pjesa e gjoksit është burim i mirë i vitaminës B12. Po kështu edhe mëlçia e pulës është shumë e mirë dhe rreth 100 gramë e saj, përmbajnë rreth 39 mikrogramë të kësaj vitamine.
Gjel deti
Edhe te gjeli i detit, veçanërisht zemra dhe mëlçia kanë sasinë më të madhe të vitaminës B12, për çdo 100 gramë, përmbajnë respektivisht 15,4 mikrogramë zemra dhe 49,4 mikrogramë mëlçia, të kësaj vitamine.
Molusqe
Përveçse përmbajnë hekur rreth (28 mg) dhe kalium (628 mg), kalcium, fosfor, zink me konsumimin e molusqeve ne përfitojmë edhe nga vitamina B12, pasi përmban rreth 98,9 mcg për 100 gramë (e barabartë me 1648% nga sasia e domosdoshme ditore).
Salmon dhe Troftë
Salmoni përveçse është i pasur me acide yndyrore omega 3, nuk duhet të mungojë në asnjë mënyrë në dietën tuaj ushqimore, pasi një fileto salmon përmban rreth 9 mikrogram të vitaminës B12. Edhe trofta përmban vitaminë B12, edhe pse në sasi disi më të kufizuar, pasi në 100 gramë troftë gjendet rreth 4,2 mikrogramë vitaminë B12.
Sardele
Burim kryesor i proteinave dhe acidit (DHA), të cilat janë thelbësore për zhvillimin e trurit të fetusit në mitër dhe funksionet njohëse, sardelet mund të mbulojnë pothuajse 20% të kuotës së përditshme ditore të vitaminës B12.